Koronabirusa

Gureak taldean lana etetea hitzartu dute, industria atalean

Erabiltzailearen aurpegia
Argazkia: Gureak

Enpresak industria ataleko bere 2.500 langileen soldatak osatuko dituela adostu du sindikatuekin. Tolosaldean Apatta Industrialdeko Gureak Lanean SA lantegiari eragiten dio, hau da, 250 bat langileri.

Gureak taldea batu zaio jarduera etetea erabaki duten enpresen zerrendara. ELAk agiri baten bitartez jakinarazi duenez, sindikatuek (ELA, LAB eta CCOO) eta zuzendaritzak enplegua aldi baterako erregulatzeko akordioa lortu dute.

Gureak-ek 2.500 langile inguru ditu, horietatik gehienak elbarritasun fisikoekin eta psikikoekin. Industrian eta zerbitzuetan aritzen da.

«Gauden testuinguru bereziki zailean, pertsonarik ahulenak babestuko dituzten akordioak lortu behar ditugu. Pertsonen egoera psikosoziala babestu nahi dugu, batez ere, alarma sozialeko testuinguru horretan desgaitasun psikikoa duten pertsonen egoera. Kolektibo hori, gainera, koronabirusaren aurrean kalteberatasun bereziko taldea da, birusarekiko bereziki sentikorrak diren patologiekin», oroitarazi dute zuzendaritzak eta sindikatuek.

Lan agintariek espedientea onartzen badu, langileek langabezia sari berezia jasoko dute etenaldiak irauten duen bitartean, baina Gureak taldeak sari hori beren ohiko ordainaren %100 izan arte osatuko du, aparteko ordainsariak barne.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!