Gaur hasi eta azaroaren 1a bitarte iraungo du Berastegiko kultur asteak. Arratsaldean, txikienak izan dira protagonista eta jolasean ibili dira herriko frontoian. Kaxa jokoan, 20 kaxaren gainera igotzea lortu duenik egon da eta piñatan, berriz, goxokiak barra-barra lortu dituzte, globoak lehertuta.
Gaurkoari amaiera Pablo Iztueta historialaren hitzaldiarekin emango diote; 19:00etan izango da.
Asteburu honetan izango du lehen etapa kultur asteak, eta hortaz, gaurko ekitaldiez gain, bihar eta etzi ere izango dute zer egin, zer ikusi eta zer ikasi berastegiarrek. Hemen hurrengo bi egunetarako egitaraua:
BIHAR, URRIAK 24
10:30. Belabietako estazio megalitikoa ezagutzeko ibilaldia, Manu Zeberioren eskutik (Aranzadiko arkeologoa). Plazatik abiatuta, 2-3 orduko ibilaldia.
15:00. Mus txapelketa herrikoia, Gaztainondo elkartean.
19:00. Pintxo potea herrian zehar.
23:00. Musika iluntzea Elizagoien ahizpak trikitilarien eta Sukarra 37 taldearen eskutik, Urepele biltokian.
ETZI, URRIAK 25
17:00. Kontu eta kantu ikuskizuna haurrentzat erabilera anitzeko gelan. Bertan haurrek kantu, ipuin eta bertsoez gozatzeko aukera izango dute.
19:00. Xendarineko ahizpen kantu emanaldia, erabilera anitzeko gelan.