Indartsu dator Oriaren ertzeko harrobia. Bai, behintzat, joan den igandeko estropadetako emaitzei begiratuz gero: Gipuzkoako batel txapelketan bi bandera irabazi zituen Tolosaldeko Arraun Klubak.
Pasai San Pedroko uretan izan ziren norgehiagokak, eta zortzi kategoriatatik bitan eskuratu zuten garaipena, lehorreko arraunlariek: emakumezkoen infantil mailan eta emakumezkoen jubenil mailan. Infantiletan, 04:59ko denborarekin eskuratu zuten Gipuzkoako txapelketako bandera, eta seina eta zazpina segundoko aldea atera zieten, gainera, Getariako eta Orioko arraunlariei, hurrenez hurren. Jubenil neskek, berriz, 10:00an geratu zuten kronoa; 9 segundo atera zizkioten sanjuandarrei, eta 20 Hibaikari.
Aipatzekoa da, emakumezko promesen txandak emandakoa: txapeldunorde suertatu zen TAK, baina 19 ehuneneko baino ez ziren izan Tolosaldekoen eta Hibaikako txapeldunen artean.
Gizonezko infantilak ere igo ziren podiumera, hirugarren sailkatu baitzen TAKeko batela, Illunbe trintxerpetarren eta Zumaiaren atzetik.
Azkenik, bi laugarren postu ere batu zituzten TAKen palmaresera: gizonezko kadeteena eta gizonezko seniorrena.
Balizak inguratzearen artea
Bandera izan ohi da arraunlariaren helburu, baina, Gipuzkoako batel txapelketak bestelako gaitasunak ere txalotu zituen igandean: patroienak.
Horrela, ziabogarik onenaren saria ere eskuratu zuten TAKeko hiru patroik: Irati Romerok emakumezko promesen txandan; Laiene Izagirrek gizonezko infantilen txandan; eta, azkenik, Iñaut Izagirrek, gizonezko kadeteen txandan.