Eskualde txikia izanagatik, Tolosaldeko Lanbide Heziketa zikloen eskaintza oso zabala da. Guztira, alor ezberdinetako 20 ziklo eskaintzen dituzte eskualdeko ikastetxeek eta, hain zuzen, eskaintza zabal horren erakusleiho bihurtuko da hurrengo ostiralean eta larunbatean Tolosako Trianguloa.
Bigarren urtez jarraian, Lanbide Heziketa Azoka antolatu dute Tolosaldea Garatzen Garapen Agentziak, Tolosaldeko Lanbide Heziketako ikastetxeek, Peñascal fundazioak, Tolosa Euskararen Hiriak eta Tolosako Udalak. Lehiberri zentroan egin zuten aurkezpena, eta Olatz Peon Tolosaldea Garatzeneko lehendakariak eskualdeko lanbide heziketaren eskaintza balioetsi zuen: «Langile kualifikatuak hezten dituzte, lan merkatura begira. Guztia, gainera, euskaraz egiten dute, eta azpimarratzekoa da».
Gaur egun, Tolosaldean 1.200 ikasle ari dira Lanbide Heziketa ikastetxeetan, eta urtero 600 ikasle berri hartzen dituzte. Tolosaldea LHIIko zuzendariak, ordea, ikasle gehiago behar dituztela dio: «Enpresek eskaera handiagoa egiten digute, izan ere, Lanbide Heziketako ikasleek prestakuntza tekniko gorena jasotzen dute. Soldata onak dituzte, eta ikasleen %80 inguru lanean hasten dira, ikasketak amaitu bezain pronto». Horren harira, aipatzekoa da Peonek emandako datua: «2013an eskualdean 3.500 lan kontratu sinatu zituzten, eta iaz 5.000 inguru».
Etorkizunari begira jarri, eta balizko bide bat aukeratzeko garaian daude ehunka gazte, eta Lanbide Azokak hainbat ate proposatuko dizkie horretarako. Izan ere, eskualdean eskaintza zabala du Lanbide Heziketak, Amaia Karrera Inmakulada Lanbide Heziketa Ikastolako ordezkariak azaldu bezala: «Hainbat familia profesionaletan aritzeko aukera dugu, Tolosaldetik irten gabe, 5 ikastetxetan, eta hori altxor bat da».
Larunbatean, berriz, herritar guztientzat zabalduko dute azoka. Interesa eta jakin-mina duen edonork gerturatu ahal izango du azokara eta ikasketa guztien inguruko azalpen teorikoak eta praktikoak eskainiko dituzte lanbide heziketako zikloen arduradunek: «Ikastetxeek eskaintzen dituzten zikloen informazioa zuzen-zuzenean ezagutu eta eskuratzeko aukera izango da, baita beste ezaugarri eta ekimenen praktikak, lan poltsa, DUAL prestakuntza, ETHAZI metodologia, etab ingurukoa ere», azaldu dute ikastetxeetako arduradunek.
Eginez ikasi, zure apustua euskaraz
Eginez ikasi, zure apustua euskaraz da aurtengo azokaren leloa. Tolosaldeko Lanbide Heziketako ikastetxeen hizkuntza nagusia euskara da; eskualdeko ziklo guztiak euskaraz eskaintzen dituzte, eta euskararen garrantzia azpimarratu nahi izan dute aurtengo edizioan.
EGITARAUA
MARTXOAK 31, OSTIRALA
09:00-14:00. Ikastetxeetako ikasleen bisita gidatuak: Erniobea ikastetxea, Orixe ikastetxea, Leitzaran ikastetxea, Laskorain ikastola, Erniobea ikastetxea, Zubimusu ikastola, Uzturpe ikastola eta Herrikide ikastetxea.
APIRILAK 1, LARUNBATA
10:00-14:00. Tolosaldeko Lanbide Heziketako ikasketa eskaintzen azalpen teorikoak eta praktikoakjasotzeko eta ikasteko aukera. Publiko guztiarentzat irekia.
TOLOSALDEKO IKASTETXEAK
FRAISORO NEKAZARI ESKOLA
Lorezaintza eta loregintza.
Nekazaritza eta abeltzaintza.
Baso kudeaketa eta natura.
INMAKULADA IKASTETXEA
Erdi maila.
Mendekotasun egoeran dauden pertsonei arreta egiteko teknikaria.
Erizaintza laguntzailea.
Farmazia-Parafarmazia
Goi maila.
Gizarte integrazioa.
Osasun dokumentazioa eta administrazioa
Diagnosi irudia eta medikuntza nuklearrra.
TOLOSALDEA INSTITUTUA
Erdi maila.
Soldadura eta galdaragintza
Mekanizazioa
Mikroinformatika sistemak eta sareak
Instalazio elektriko eta automatikoak
Merkataritza jarduerak
Goi maila.
Administrazio eta finantzak
Automatizazioa eta robotika industriala
Sareko informatika-sistemen administrazioa
Fabrikazio mekanikoko produkzioaren programazioa
Eraikuntza metalikoa
Instalazio termikoak eta fluidodunen mantentzea
PAPER ESKOLA
Erdi maila.
Kimikagintza.
Goi maila.
Kimika industriala.