Aralar Bizirik plataformak ibilaldia antolatu du igande honetarako Goroskintxuko pista berrira. Antolatzaileek azaldu dutenez, ibilaldiaren helburua «Eniro-Aralar Mankomunitateak Diputazioaren babesarekin 2016ko urri-azaroan egin duen Goroskintxuko pista berriaren inpaktuak ezagutzea eta baita hainbat txokotako edertasun eta natur balioez gozatzea» da.
Lizarrustiko Parketxeko aparkalekuan elkartuko dira 09:30ean eta 10 kilometroko ibilaldia egingo dutela azaldu dute. Elkartzeko beste aukera bat, 11:00etan Intzesaon dela azaldu dute Aralar Biziriketik.
Ibilgailuak partekatzea gomendatzen dute eta ibilgailuetan tokia izanez gero, partekatzeko Ataungo udaletxeko plazan 09:00etan elkartuko direla jakinarazi dute. Bestalde, oinetako eta jantzi egokiak eramatea aholkatu dute, eta ibilaldian parte hartzea eta erantzukizuna parte hartzailearen ardurapean dagoela gaineratu dute.