Jaurlaritzak eskualdeko osasun arreta ebaluatu beharko du

Tolosaldeko Ataria 2017ko ots. 2a, 16:59
Tolosaldea Osasun Publikoaren Alde koordinakundeak bost urtetako ibilbidearen balorazioa egin zuen azaroan.

Eusko Legebiltzarreko osasun batzordeak onartu egin du EH Bilduren proposamena; EAJk eta PSE-EEk aurkako botoa eman dute

Mahai gainean bi eskari jarri zituen, atzo, EH Bilduk, Gasteizko (Araba) Legebiltzarrean. Osasun batzordeko bilkura izan zuten eta, batetik, eskatu zuten Tolosaldeko osasun arretaren ebaluazio bat egiteko, lau hilabeteko epean. Era berean, osasun zerbitzuaren eredua aztertze aldera, eragile, erakunde eta herritarrekin osasun mahaia osatzea proposatu zuen koalizioak.

Bide horretan, EH Bilduko kide Maider Otamendik «osasun arreta hobea» defendatu zuen: «Ebaluzioa eta mahaia beharrezkoak dira, Tolosaldean osasun arreta publiko, unibertsala eta kalitatezkoa eskaintzeko. Eskatzen duguna ez da astakeria, Tolosaldea baita osasun arreta publikoa enpresa pribatu batek kudeatzen duen eskualde bakarra, EAEn».

Bi proposamenetatik bakarrak egin zuen aurrera eta, horrenbestez, Eusko Jaurlaritzak ebaluazio txosten bat garatu beharko du, lau hilabeteko epean. EH Bildurekin batera, Podemosek eta PPk ere aldeko botoa eman zioten egitasmoari.

Kontrara, ordea, EAJk eta PSE-EEk aurkako botoa eman zioten Tolosaldeko osasun zerbitzuaren ebaluazioa egiteko aukerari. Era berean, bi alderdiek uko egin zioten Tolosaldean osasun mahaia osatzearen aukerari ere.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!