Tolosako Udalak, Tolosako Ingurumen Zentroak, Zumardia elkarteak eta TAK arraun taldeak lagunduta, Oria ibaia garbitzeko lehen hitzordua izan da, gaur, Tolosan. 11:00etan hasi dira, eta piraguan nahiz alan aritu dira arraunean, ibai ertzetan pilatutako zabor eta hondakinak kentzeko.
Patxi Amantegi ingurumen zinegotziak azaldu duenez, "uraren kalitatea oso ona da, baina ibaiaren kalitatea ez, ibaia ez baita ura bakarrik"; hondakin asko egoteaz gain, dauden harriak txikiak direla azaldu du, eta handiagoak beharko luketela izan.
Horrela, ur ertzean pilatutako materiala eta zaborra kentzen ahalegindu dira, bi orduz. Iaz hainbat izokin askatu zituzten Oria ibaian eta, Amantegiren ustez, bi urte barru-edo, bueltan izango dira; lehenik, presa puzgarrian obra txiki bat egingo dute. Aipatzekoa da, aldundiak duela bizpahiru urte markatu eta zabaldutako izokinetako bat Iruraraino igo dela jada.