Tolosako liburuen erreketaren 80. urteurrena gogoratuko du Tolosako Udalak

Tolosaldeko Ataria 2016ko abu. 5a, 14:29

1936ko abuztuaren 11an Tolosa hartu berria zuten frankistek Ixaka Lopez Mendizabalen argitaletxea arpilatu, eta liburuak ostu eta plaza erdian erre zituzten. Abuztuaren 11n 80 urte beteko dira.

Tolosako Udalak azaldu duenez, herriko liburutegiko eta eskoletako euskal liburuak ere erre zituzten: "Euskal Pizkundea sutara kondenatu zuten".  XX. mende hasieran gizarte dinamiko bat, Gipuzkoako inprimategi garrantzitsuenetako bat – Lopez Mendizabal argitaletxea-, lehenengo ikastoletako bat (1922) eta belaunaldi gazte eta berritzaile bat sortu zen Tolosan: "Tolosa euskal kulturaren eta hizkuntzaren aldeko 'Euskal Pizkundea' mugimendu kultural eta politikoaren bihotza izan zen", adierazi dute.

Abuztuaren 11an gogora ekarri nahi dute gertakizun "latz" hura: "Ezin da horrelakorik errepikatu, ez hemen eta ez inon". Euskal kulturaren kontrako kultur genozidio ahalegin horri eman zion erantzuna aldarrikatu nahi dute Tolosako Udaleko kideek, "euskara eta euskal kultura biziberritzea ekarri zuena".

Abuztuaren 11n izango da ekitaldia. Aurkezpena Koldo Ordozgoitik egingo du, eta Iñaki Garmendiak eta Miren Lopez-Mendizabalek gertatu zenaren testigantzak eskainiko dituzte. Herritarrei liburu batekin bertaratzeko deia egin diete, ekitaldiaren parte bilakatzeko.

 

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!