Gipuzkoako kobazulo batean topatutako gizakiaren presentziaren aztarna zaharrenak, Brontze Aroko meatzaritzaren nolakotasunak, Erdi Aroko hilobiratzeak... Antzinako bizimoduaren informazio baliagarri ugari atera dute argitara Gipuzkoan aurten egin dituzten indusketa arkeologikoek. Aurkikuntzen «gizarte eragina» eta haien «balio zientifikoa» nabarmenduta, urteko jardunaren balorazio ona egin zuen atzo Denis Itxaso Gipuzkoako Kultura diputatuak. 42 proiektu aurkeztu dira aurten diru laguntzen deialdira, eta 101.500 euro bideratu dituzte horietara —Praileaitzeko aztarnategira beste 30.000 euro bideratu dituzte—. Egitasmoetatik hamahiru, urteetan egindako indusketak dira; beste hemezortzi, miaketak, zundaketak eta arte ikerketak; eta gainerakoak, materialen inguruko azterketak.
Datorren urteari begira, lan horietarako aurrekontua %66 handituko dutela hitzeman zuen diputatuak, eta, hortaz, 198.000 euroraino iritsiko direla laguntzak. Aurtengo uztaren adibide modura, lau proiekturen emaitza nagusiak azaldu zituzten atzoko agerraldian haietako bakoitza zuzentzen duten Alvaro Arrizabalaga, Xabier Peñalver, Mertxe Urteaga eta Iosu Etxezarraga arkeologoek, eta Iñaki Amundarain Amezketako alkateak. Lau proiektu horien artean daude Basagainekoa (Anoeta), Sanpedroburukoa (Bidania-Goiatz) eta Arritzagakoa (Amezketa).
Jarraitu albistea irakurtzen Berria egunkarian.