Organismo baten arterietatik zabaltzen den odol fluxua. Hemoglobina, oxigenoa garraiatzen lurraldearen zelula guztietara. Euskararen arnasa emanaz elkarri. Tipi tapa, tipi tapa. Oin zolek lurraren kontra txaloka ospatuko dute euskarak kaleak, espazio publikoak, erreklamatzen dituela. Mundu bat euskara bilduko direla hamaika egunez ekimen honen baitan.
Euskaldunok osatzen dugun eraikinaren adreilu bat naizenaren aldetik, hitzari helduko diot gaurkoan. Orain dela hamar urte (hamar, ufa!) lekukoari heltzeko aukera izan nuen. Eta altxorren kutxan gordeko dut betirako egun horren oroitzapena. Inmakulada Ikastetxearen izenean ikaskide batek eta biok kilometro batez lekukoa hartu genuen. Urte hartan “heldu hitzari, lekukoari, elkarlanari, euskarari, herriari” izan zen goiburua, eta horrelaxe ekin genion guk. Elkarlanean.
Mezu sekretuaren gordailua bi eskuz eutsiaz, bi pertsona ezberdinek mezu berbera zabaltzen genuen. Horregatik izan zen esperientzia hura hain preziatua niretzat. Euskal Herri osoa astintzen duen ekimen batean lehen eskuko parte hartzea izatea izugarria izan zen noski. Baina euskalakarien aurpegien aniztasunari ekarpen txiki bat egin genion. Horrek, hunkitu egin ninduen.
Euskaltzale guztion parte hartzeak korrika den hizkuntza-berdintasunaren aldeko jaia anitzagoa egiten du. Mundu bat euskara bilduz, mundu unibertsalagoa sortzen du eta.
Horregatik, euskaraz ikasi, bizi, lan egiteko eta maitatzeko aukera izan duen honek tipi tapa egingo du aurten ere korrika. Nire gurasoek ez bezela, nire ondorengoek aukera hori beti izan dezaten. Zuri ere gonbidapena luzatu nahi nizuke: Bat egin dezagun! Omendu dezagun AEK, edota euskararen alde egiten duen edonor. Euskara den hizkuntza, kultura eta munduaren alde egin dezagun korrika. Nik, hik, hark. Guk, zuk, zuek, haiek. Tipi tapa, tipi tapa. Goazen danok bat egitera. Zuk egitera. Euskaraz.