Ibarran Hauspoa kultur elkarteak du Santa Ageda bezperako kantu saioa antolatzeko ardura. Aurten ere ez dute huts egin, eta jada egin dituzte etxeko lanak. Santa Ageda bezpera larunbataz ospatuko da aurten, eta hori dela eta egun osoko egitaraua antolatu dute, bazkari eta guzti. Kantuan goizetik aterako dira, eta lehenengo ospel-aldetik ibiliko dira, eta gero, egutera-aldetik.
10:00etan abiatuko dira herriko plazatik eta ikastola dagoen alderdian ibiliko dira baserriz-baserri. Eguerdirako itzuliko dira herrigunera eta kirol elkartean bazkalduko dute. Bazkarian parte hartu nahi dutenek 15 euro ordaindu beharko dituzte.
ARRATSALDEAN IZASKUNERA
Bazkalostean egutera izango dute lagun. Izaskun aldera joango dira 17:00etan plazatik abitatuta. Kantuan ateratzeko entsegua ere egingo dute, eta hori bihar izango da, hilak 2, 20:00etan, Azkue kaleko hezitzaileen lokalean.
Kantuan atera nahi dutenek herriko elkarteetan eta Zubiaurre tabernan jarri dituzten zerrendetan eman behar dute izena eta azken eguna otsailaren 2a izango da. Hauspoak herritar guztiak gonbidatu ditu ekitaldian parte hartzera, «herri giroa sustatzeko eta ongi pasatzeko aukera ezin hobea» dela esan dute.
Santa Ageda larunbata izango denez, Hauspoa elkarteak egitarau zabala prestatu du; bazkaria ere egingo dute.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!