Iñaki Urkizu antolakuntzako kideak azaldu duenez, 6 urtetik beherako haurrek «ibilbide labur bat egingo dute. Beste urteetan 12 urte azpiko proban parte hartu izan dute, eta txikienei oso luzeegia egiten zitzaien». 6 eta 12 urte bitartekoek itzuli bat emango diote ibilbide nagusiari, hau da, 1.200 metro eginez, eta 12 urtetik gorakoek lau itzuli egin beharko dituzte. 18:00etan hasiko da haurren proba, eta proba nagusia 18:30ean.
Izen ematea Urepele elkartean egin daiteke. 12 urte artekoek 4 euro ordainduko dute eta adin horretatik gorakoek 5 euro. Egunean bertan izena ematen dutenek bi euro gehiago ordainduko dute. Beste berritasuna probaren kamisetarekin zerikusia du. Parte hartzaile guztiei kamiseta emango zaie, baina bakarrik aurretik izena ematen dutenei. Probaren egun berean emanez gero ez da kamisetarik jasoko.
Parte hartzaileen artean antolakuntzak erositako eta babesleek emandako opariak zozkatuko dira. Bestalde, probaren errekorra egiten duenari, bai emakumezkoetan eta bai gizonezkoetan, urdaiazpikoa emango zaio, eta hori ere aurtengo berritasunetako bat da. Urtero parte hartzea handitzen ari da eta iaz 140 izan ziren.